Соболезнование

Г.Камал исемендәге Татар дәүләт академия театрының 1985 елдан бирле алыштыргысыз директоры булган, татар театры үсешенә зур өлеш керткән татар халкының сөекле улы Закиров Шамил Зиннур улы вафат булу сәбәпле Татарстан Республикасыннан Дәүләт Думасына сайланган депутатлар, Татар федераль милли-мәдәни автономиясе һәм шәхсән үз исемемнән Г.Камал исемендәге Татар дәүләт академия театры коллективының тирән кайгысын уртаклашам.

Бу – аерым шәхесләр өчен генә түгел, бөтен татар дөньясы өчен зур югалту. Нинди мәсьәлә буенча мөрәҗәгать итсәң дә, беркайчан да кире борып җибәрми, кулыннан килгәнчә ярдәм итә торган искиткеч саф күңелле, ярдәмчел, милли җанлы кеше иде Шамил Зиннур улы. Төбәкләрдә яшәүче татарлар арасында да аны бик нык хөрмәт итәләр, яраталар иде. Төбәкләрдәге татарлар арасында йөргәндә аның турында җылы истәлекләрне еш ишетергә туры килде. Шамил Зиннур улының якты истәлеге безнең күңелләрдә мәңге сакланыр.