"Тамырлар" этник-мәгълүмати проекты

Татар федераль милли-мәдәни автономиясе 2009 елда “Тамырлар” дип аталган этник-мәгълүмати проект эшләде. Аның максаты – Россиянең төрле төбәкләрендә яшәүче татар балаларында милли үзаң формалашуга ярдәм итү, яшь буында толерантлык хисләре уяту.

Әлеге проект Россия Федерациясенең Региональ үсеш министрлыгы (Милләтара мөнәсәбәтләр департаменты) гранты ярдәмендә тормышка ашырылды. Проектны тормышка ашыруда Г.Ибраһимов исемендәге Тел, әдәбият һәм сәнгать институты, Татарстан Республикасы Фәннәр академиясе, Татар дәүләт гуманитар педогогика университеты, Татарстан Республикасы Яшьләр эшләре, спорт һәм туристлык министрлыгы да ярдәм итте.

“Тамырлар” проекты кысаларында “Халкым Мирасы” коллекциясе чыгарылды. Ул балалар һәм яшьләр өчен исәпләнгән татар телендәге 10 аудио дисктан гыйбарәт. Коллекция 4 циклдан тора:

Кечкенә балалар өчен татар әкиятләре тупланган “Балалар өчен әкиятләр” циклы. Ул өч дисктан тора:
- “Әбием әкиятләре” дигән дискта татар халык әкиятләре тупланган.
- “Әкият юлыннан” дискында танылган татар һәм башка халык язучыларының популяр әкиятләре тупланган.
- “Россия халыклары әкиятләре” дискында Россиядә яшәүче төрле халыкларның иң матур әкиятләре тупланган.

“Балалар өчен җырлар һәм шигырьләр” циклы 3 аудио-дисктан тора. Әлеге дискларда балалар өчен иҗат итүче авторларның шигырьләре тупланган. Алар 5-10 яшьлек балалар өчен махсус сайлап алынган.
- Әлеге циклга керүче “Шаярып көлеп кенә” бүлегендә татар фольклоры тупланган. Биредә мәзәкләр, мәкаль-әйтемнәр, санагычлар, табышмаклар китерелә.
- “Балаларга шигърият” бүлеге 2 дисктан тора. Аларда татар һәм рус шагыйрьләренең балалар өчен язылган иң яхшы шигырьләре тупланган.

• “Тарихлар кайтавазы” циклы шулай ук 2 дисктан тора. Анда кече һәм урта яшьтәге мәктәп балалары өчен татар халкы тарихы сәхифәләре туплаган.

• Шулай ук халык җырларыннан торган “Сәлам сезгә...” циклы да бар. Аңа күренекле татар җырчылары башкаруында халыкның иң матур җырлары тупланган ике диск керә.

Коллекцияләр үткән 2010 елгы конференция вакытында төбәк автономияләренә таратылды. Бер өлеше исә китапханәләргә, милли-мәдәни үзәкләргә тапшырылды.
Әлеге коллекция балалар һәм яшьләргә бик ошый, чөнки андагы җырлар, шигырьләрне тыңларга да, өйрәнергә дә мөмкин. Әкиятләр тематика буенча бүленгән, аларны тыңларга бик уңайлы. Татар тарихы сәхифәләре дә бик кирәкле һәм күптән көтелгән иде. Чит төбәктә яшәүче татарлар соравы буенча җырлар тупланган дисклар да коллекциягә кертелгән иде. Анысы яшь буын өчен генә түгел, өлкәннәр өчен дә сөенечле вакыйга булды.

2011 елда  “Тамырлар” проектының “Халкым минем” коллекциясе яңа иганәчеләр ярдәмендә тагын чыгарыла. Бу юлы партнерлар – ТР Президенты карамагындагы Мәдәниятне үстерүгә ярдәм күрсәтү фонды һәм ТР Яшьләр эшләре, спорт һәм туристлык министрлыгы.
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования